दुई चेपाङ बालिका बलात्कार गर्नेलाई कडा कारवाही गर्न माग

गोरखा श्रावण २८ –एकीकृत माओवादी निकट अखिल नेपाल महिला संघ (क्रान्तिकारी)ले गोरखाको भूम्लिचोकमा दुई चेपाङ बालिकालाई बलात्कार गर्नेलाई कडा कारवाही गर्न माग गरेको छ । संघका अध्यक्ष शोभा लामिछानेको नेतृत्वमा आज प्रमुख जिल्ला अधिकारी वेद प्रसाद खरेललाई ज्ञापन पत्र बुझाउदै दोषि उपर कडाभन्दा कडा कारवाही गर्न माग गरेको हो । ज्ञापनपत्रमा उक्त बलात्कारको घटना क्रुर भएको भन्दै घटनाले आफुहरु स्तब्ध भएको जनाइएको छ ।
विज्ञप्तिमा जिल्लामा पछिल्लो समय महिला हिंसा र बलात्कारका घटनाहरु बढ्दै गएको भन्दै यस्ता घटनाका अपराधीहरुलाई कडा कानुनी कारवाही गर्न माग गरेको छ । त्यसैगरी अपराधीहरुलाई कुनैपनि हालतमा उन्मुक्ति नदिन र आगामी दिनहरुमा यस्ता घटनाहरु घट्न नदिन अन्य उपायहरु पनि अपनाउन जिल्ला प्रशासन कार्यालयलाई ध्यानकार्षण गराइएको छ । साउन ७, ८ र ९ गते सात वर्षीय र नौ वर्षीय चेपाङ दिदीबहिनीलाई जबरजस्ती करणी गरेको आरोपमा प्रहरीले भूम्लिचोकका सुदिप थापालाई शुक्रबार पक्राउ गरी अनुसन्धान गरीरहेको छ । चेपाङ दिदीबहिनीलाई थापाले करणी गरेको भन्दै पीडितका हजुरआमाले जिल्ला प्रहरी कार्यालयमा उजुरी दर्ता गरेका थिए ।