पानी नपरेपछि गोरखाको ग्रामिण भेगका खेतमा कोदोको रोपाई सुरु,

गोरखा श्रावण २२ –जिल्ला कृषि विकास कार्यालयले गोरखाका  ८० प्रतिशत खेतमा रोपाई भईसकेको बताईरहदा गोरखाका केही ग्रामीण भेगमा भने रोपाई गर्न प्रयाप्त पानी नभएपछि खेतमा कोदो रोपाई सुरु भएको छ । आकासको भेल पानी छोपी रोपाई गर्नुपर्ने टारी खेतमा पानी नपरेपछि किसानहरुले कोदो रोप्न थालेका छन् । जिल्लाको बुंकोट गाविसका किसानहरुले टारी खेतमा कोदो रोप्न थालेका हुन् । बुंकोट गाविस वडा नं. ४ का गुणाकान्त खनालले १५ मुरी धान फल्ने टिमुरे खेत र ६ मुरी धान फल्ने तोरी ढापमा रोपाई हुन नसकेपछि कोदो रोपेको बताउनुभयो । उहाँले आकासे पानीको आश गरेर बस्दा बस्दै धानको विउ व्याडमै सुकेको र भदौ लाग्न लागिसकेकोले खेत रोपाई नहुने भएपछि आफुले खेतमा कोदो रापेको बताउनुभयो ।
त्यस्तै बुंकोट गाविसकै वडा नं. ३ वयाकका अर्का किसान भरत श्रेष्ठले पनि डुम्री स्वाराको खेतमा रोपाई नभएपछि कोदो रोपेको बताउनुभयो । सोही ठाउँका अर्का किसान भक्क श्रेष्ठले पनि पधेरो खेतमा कादो रोपेको बताउनुभयो ।
सिंचाईको सुविधा नभएको र समयमा पानी नपरेको कारण गोरखाको ग्रामिण भेगका प्रायजसो टारी खेतहरुमा रोपाई हुन सकेको छैन । रोपाई नभएपछि किसानहरु खेतमा मास छर्न र कोदो रोप्न व्यस्त छन् । जिल्ला कृषि विकास कार्यालय गोरखाका प्राविधिक सहायक हिरालाल रानाभाटले भने गोरखाका लगभग ८० प्रतिशत खेतहरुमा रोपाई भएको बताउनुभएको छ ।