यस्ता छन् बाबुरामका अबका तीन बिकल्प रणनीति तय गर्न बाबुराम पक्षको अन्तिम छलफल चल्दै

काठमाडौं,जेठ २२– विराटनगरमा हालै सम्पन्न राष्ट्रिय सम्मेलनले एकलौटी ढंगले केन्द्रीय सदस्य मनोनयन गरेर आफ्नो पक्षलाई साइजमा ल्याएको निष्कर्षमा पुगेको एमाओवादीभित्रको बाबुराम खेमाले नयाँ रणनीतिसहित अघि बढ्ने तयारी थालेको छ । संस्थापन पक्षले ‘विधि र प्रक्रिया मिचेर नौटंकी गरेको’ आरोप लगाउँदै पोलिटव्युरो, स्थायी समिति र पदाधिकारी निर्वाचनमा सहभागिता नजनाएको यो खेमाले ‘हटेर होइन डटेर’ अघि बढ्ने निष्कर्ष निकाल्दै पार्टीभित्र आफ्नो पक्षलाई थप बलियो बनाउन छलफललाई घनीभूत बनाइरहेको छ । पार्टीको हालै सम्पन्न केन्द्रीय समिति बैठकपछि देखिएको अन्योललाई हल गर्न आफू पक्षीय केन्द्रीय सदस्यहरूलाई बोलाएर बाबुरामले परामर्शलाई  तिव्रता दिएका छन् ।  आफ्नो लाइन स्पष्ट पार्न अहिले छलफलकै प्रक्रियामा रहेका बाबुराम पक्षीय नेताहरूबीचमा केही विकल्पमाथि घनीभूत रुपमा छलफल चलिरहे पनि निष्कर्ष भने निकालिएको छैन । बाबुराम पक्षीय एक नेताले दिएको जानकारी अनुसार अहिले यो समूह तीन विकल्पमाथि केन्द्रित भएर आफ्नो भावी दिशा स्पष्ट पार्ने कार्यमा जुटिरहेको छ ।
स्रोतका अनुसार अहिले यो खेमामा पार्टीभित्र निर्वाचित गराइएका पदहरू स्वीकारेर संघर्ष गर्ने या  पद नलिने तर केन्द्रीय समितिको जिम्मेवारी ग्रहण गरेर पार्टीभित्र अन्तर्संघर्ष चर्काउने विकल्पमा माथापच्ची चलिरहेको छ ।  संविधान नबनुञ्जेल पार्टीमा लड्ने र त्यसपछि नयाँ पार्टी बनाउने अर्को विकल्प पनि उक्त खेमामा पेश भएको बताइएको छ । पेश भएका यी तीन विकल्पमध्ये अन्तिम विकल्प संविधान नबनुञ्जेलसम्म पार्टीभित्र लड्ने र त्यसपछि पनि नसुध्रिएमा नयाँ पार्टी बनाउने विकल्पमा अधिकांश बाबुराम पक्षीय केन्द्रीय सदस्यहरू मतैक्य देखिएको बताइएको छ ।  यद्यपि बाबुराम पक्षले आफ्नो धारणा भने अझै तय गरिनसकेको र केही दिनमै छलफललाई टुंग्याउने गरी गृहकार्य भइरहेको स्रोतको ले बतायो  । बाबुराम पक्षीय नेता नवराज सुवेदीले विराटनगर सम्मेलनपछि पार्टीमा धेरै स्खलन आएको दाबी गर्दै पार्टीमा अन्तरसंघर्ष गरेर अघि बढ्ने बताए । ‘विराटनगर सम्मेलनपछि पार्टीमा थप विचलन र स्खलनहरू देखा परेका छन्’, संवाददातासँग कुराकानी गर्दै उनले भने, ‘अब पार्टीमा बहस र छलफल गरेर मतान्तरहरूलाई हल गर्दै जानुको विकल्प छैन । अब हामी छलफल, बहस मार्फत नै अगाडि बढेर पार्टीमा आफ्नो भूमिका निर्वाह गर्छौं ।’ उनले पार्टीमा केन्द्रीय सदस्यको जिम्मेवारीमा बस्न आफ्नो पक्ष तयार भए पनि अन्य पदहरूमा भने नबस्ने स्पष्ट पारे । आगामी महाधिवेशनसम्म अन्तरसंघर्ष गरेर पार्टीलाई नयाँ बनाउन लाग्नुको विकल्प नभएको उनको तर्क थियो ।