शुक्रबारबाट प्रदर्शनमा आउने चलचित्र ‘प्रेमगीत’

प्रेम कथा नै चलचित्रको मुख्य सार हो । बिहे गर्न नमानेर काठमाडौबाट भागेर कागबेनी जाँदै गरेकी गीत र काम विशेषका कारण मुक्तिनाथ हिडेको प्रेमको बिच बाटोमा हुने भेटले चलचित्रलाई अगाडि बढाउँछ । एकसाथ कागबेनीमा रहँदा बस्दा पलाउने माया, परिवारको अवरोधले उत्पन्न हुने समस्यामा यो चलचित्र घुमेको छ । अब, प्रेम र गीतको मिलनका लागि उनीहरुको परिवार अवरोध बन्छ या बन्दैन, उनीहरुको प्रेम सफल हुन्छ या असफल, यसका लागि दर्शकले हलमै गएर चलचित्र हेर्नुपर्ने हुन्छ । संगीतकार अर्जुन पोख्रेलले उनको अहिलेसम्मकै करिअरमा अब्बल संगीत दिएका छन्, जसलाई चलचित्रको उच्च प्रमोशनले साथ पनि दियो । चलचित्रको शर्ष गीत सर्वाधीक रुचाइएको छ र राम्रो पनि छ । 

चलचित्रको अर्को सबल पक्ष यसको छायांकन हो । चलचित्रलाई कागबेनी, मुक्तिनाथ, पोखरा र काठमाडौंमा खिचिएको छ । खिचाइमा छायांकार राजेश श्रेष्ठले आँखा शीतल बनाउने काम गरेका छन् । नेपालमा पनि यति रमणीय र लोभलाग्दा स्थान छन् भन्ने कुरा यो चलचित्र हेरेपछि थाहा हुन्छ । 

युवापुस्तामा हुने आकर्षण, त्यसले जोड्ने प्रेम, टाढा हुनुको पीडा अनी परिवारका कारण आउने प्रेमको अवरोध धेरै यूवायूवतीले भोग्ने कथा हो । यही कथाको वरिपरि घुमेका कारण पनि चलचित्र यूवापुस्ताका लागि रुचिकर बन्न सक्छ । चलचित्र ‘स्केप’मा मुख्य नायकको रुपमा देखिएपनि आशातित सफलता नपाएका नायक प्रदीप खड्काले यो चलचित्रबाट सम्भावनाको प्रशस्त ढोका खोलेका छन् । प्रदिपले प्रेमको रुपमा जुन काम गरेका छन्, त्यसले उनी चलचित्र क्षेत्रमा उदाउने पक्का जस्तै छ । चकलेटी अनुहारका प्रदिपले लभस्टोरी बिषयमा आफूलाई सफल बनाउन सक्छन्, ‘प्रेमगीत’ले यसै भन्छ ।